Free Shipping to any place around the world.

نصائح شيب إيجيبت لبيع الأحذيه أونلاين

by Ship Egypt on February 04, 2020

بتبيع أونلاين أحذيه؟ أكيد عندك مرتجات كتيره و طبعا بتخسر بسبب الشحن أو تمشيها عافيه مع العميل و تقوله إدفع الشحن.

 

طبعا ده بيخسرك العميل حتي لو كان عاوز يشتري المنتج بعد ما يتبدل.

ممكن تهدي أعصابك و تعالي مع شيب إيجيبت نحدد المشكله و نحللها ببساطه لإن الحل عندنا من واقع خبرتنا، و أكيد بعدما تقرأ المقاله دي مرتجعاتك حتقل و ممكن توصل للمعدل الطبيعي.

إحنا في شيب إيجيبت يهمنا تنجح جدا لإن كل ما تنجح حتشحن أكتر فناخد منك فلوس شحن أكتر، نظرتنا بقي مش كده و بس إحنا عاوزينك تنجح علشان تكون شيب إيجيبت جزء في مشوار نجاحك.

 

تعالي نتفق إن الشحن مهم جدا من حيث السعر المناسب و التسليم السريع و كمان تحصل فلوس المبيعات بشكل أسرع و منظم.

طيب حنبتدي مع حضرتك من البدايه علشان تعرف إزاي تقلل مرتجعاتك لأي سبب تجنبا إنك تخسر فلوس الشحن أو العميل نفسه.

دائما لازم تكون عامل حسابك في 20 جنيه إحتياطي تضيفهم علي سعر المنتج أو تخصمهم من الربح لكل أوردر، و حتعرف ليه و إنت بتكمل قراءة المقال ده.

في 3 أنواع رئيسيه للمقاس في الأحذيه : الأمريكي - الأوروبي - البريطاني
كمان المقاسات بتختلف من مقاسات الرجالي و الحريمي و الأطفالي

شوف الصور دي:

و إنت بتعمل كمبين أو إعلان أو حملة تسويق أو حتي لو كنت بتشغل مسوقين بالعموله معاك ركز جدا إنك تعرفهم إزاي بعد ما يعمل كلوز أو يتم البيع مع العميل يأكد علي مقاسات رجله من أول صباعه الكبير و حتي الكعب بالخطوات التاليه: "قول للعميل من غير كسوف التالي"

  • حضرتك أقعد علي أي كرسي. 
  • هات حضرتك ورقه فاضيه و حطها علي الأرض و دوس عليها من غير ما حضرتك تكون لابس أي شوز أو شراب.
  • هات أي قلم رصاص أو جاف و عند الكعب بالضبط علم علي الورقه عمودي و برضه عند صباع حضرتك الكبير علم علامه تانيه علي الورقه بشكل عمودي برضه.
  • هات حضرتك مسطره و قيس كده كام سنتيمتر بين الخط اللي عند الكعب و الخط اللي عند الصباع الكبير.
إسأل العميل برضه حضرتك قالب رجلك عريض و لا رفيع "ده طبعا مهم في الأحذية الكلاسيك تحديدا".

بالطريقه دي حتبقي متأكد 100% من مقاس العميل لإنك بكل تأكيد عارف الحذاء اللي بيتبعه المقاس كذا يلبس رجل طولها كام سنتيمتر، و لو مش عارف إبدأ قيس بنفسك علشان تعرف مثلا مقاس 42 طول القدم بيكون كذا سم زي الصوره دي:

 

تعالي بقي فلتر العميل الجد في الشراء من اللي عاوز يشوف المنتج بس أو يتسلي:

بعد ما تاخد المقاس مضبوط و تكون تأكدت من إنه مقاس عميلك لازم تأكد علي العميل إن الدفع عند الإستلام و مفيش حاجه إسمها أفتح و أشوف المنتج و أقيسه الأول .. حضرتك إستلم و لو فيه أي مشكله في المقاس حبعت لحضرتك شركة الشحن تاني تعمل بيك آب و أشحن لحضرتك مره أخري مجانا أو بنصف الثمن أو بسعر الشحن حسب ما إستراتيجيتك أو حسب سياستك في التعامل مع العملاء فيما يتعلق بالسعر.

في الأول ذكرنا إنك لازم تضيف 20 جنيه علي الأقل في سعر المنتج أو تخصمهم من أرباحك لإن في عملاء ممكن بعد ما تشحن ما يستلمش أو يحصل إنك ترجع المنتج مره أخري علشان لون مثلا أو مقاس، المبلغ ده تحديدا بيأمنك كتاجر أو بائع من إنك تخسر بسبب الشحن و كمان بيكون عندك مساحه او ميزانيه تقدر تواجه بيها المرتجعات لإن مفيش شركة شحن ناجحه حتشحن لحضرتك منتجات لعملاؤك ببلاش.

كمان لازم تختار شركة شحن تكون ملتزمه معاك و عرف عميلك إن موعد التسليم حيكون خلال 3 أيام عمل حتي لو شيب إيجيبت أو غيرها بتوصل خلال 48 ساعه فلازم تزود يوم او يومين لإن ساعات ممكن تتأخر الشحنه بسبب خارج عن إرادة الجميع زي نقص بيانات العميل و خلافه.

كمان و دي آخر خطوه راجع مع العميل البيانات بتاعت العنوان هاتفيا يعني اتصل بيه علي الرقم اللي اداهولك و أكد معاه بيانات المنتج و بيانات الشحن زي الإسم و رقم المبني و اسم الشارع و المنطقه و الحي و العلامه المميزه و أخيرا تقوله مبلغ الدفع عند الإستلام.

بالشكل ده مرتجعاتك حتقل لتصل لنسبة 20% و ده المعدل الطبيعي في مرتجعات الأحذيه اللي تباع أونلاين

إشحن مع شيب إيجيبت دلوقتي و تواصل علي الواتسآب 01122233666

  
LEAVE A COMMENT

Please note, comments must be approved before they are published


BACK TO TOP