Free Shipping to any place around the world.

عميلك مش مستعجل و لا حيكنسل إنت اللي بتخليه يعمل كده؟

durch Ship Egypt auf February 06, 2020

طبعا من ضمن أكتر الأسباب لرفض شحنه من خلال خبرتنا هي هندلت حضرتك للعميل بعد ما يشتري أونلاين، إيه ده هو فعلا إشتري؟ طب دفعلك و لا حيدفع عند الإستلام؟

 

طالما عميلك مدفعش يبقي مشتراش و معظم اللي بيبيع أونلاين بيقع في الخطأ ده لإنه بيسيب العميل بعد ما ياخد عنوان الشحن و يظل صامت تاركا العميل في قبضة الشك.

طب المفروض تعمل إيه بعد ما العميل يؤكد معاك المنتج اللي عاوزه؟

تعالي معانا ببساطه نشرح لحضرتك حاجات تايهه عنك أو مبتعملهاش أصلا و بالتالي عميلك لما توصله الشحنه يكنسل أو يقفل في وش مندوب شركة الشحن السكه، أيوه ده بيحصل و مش مكسوفين لما نصارح حضرتك و نصارح نفسنا و نوضح الأسباب اللي بتبدأ غالبا من عندك علشان خاطر حضرتك فكرت إن العميل كده إشتري خلاص.

 

البيانات:

دايما بيانات عميلك بتكون آخر حاجه تاخدها منه علشان المنتج يوصله، كل ما تاخد بيانات دقيقه من عميلك عن عنوانه كل ما بتضمن إنه يستلم.
إسأل عميلك عن إسم المستلم، رقم المبني و الدور، إسم الشارع و المنطقه، الحي و المدينه، رقم الموبايل وأخيرا العلامه المميزه و أنسب وقت للتسليم. "إكتب كل ده في بوليصة الشحن"
إوعي تفتكر إن العميل حيهرب منك أو ده فضول منك لما تاخد البيانات دي، بالعكس اللي عاوز يشتري فعلا حيكون متعاون معاك بشكل إيجابي علشان بياناته تكون واضحه و الأوردر أو الشحنه توصله بسرعه.

الإتصال التأكيدي:

بعد ما عميلك يديلك البيانات دي و بعد ساعتين إتصل بالرقم و أكد الأوردر و أكد العنوان و لو الوقت متأخر إتصل الصبح أو الظهر و إوعي تشحن حاجه قبل ما تعمل الخطوه دي علشان تقلل المرتجعات و كمان تتأكد من إن الأوردر من عميل فعلا مش من مخادع.

 

مدة الشحن:

دايما زود يوم أو إتنين علي موعد التسليم يعني في شيب إيجيبت إحنا بنسلم القاهره اليوم التالي، حضرتك لازم تقول للعميل خلال 48 ساعه.

العميل حيقولك كتيييييير و لييييه، ببساطه قوله تجهيز و تغليف أوردر حضرتك مع الشحن بشكل آمن لازم ياخد الوقت ده.

تاني العميل لو عاوز المنتج لا يمكن يلغي الأوردر علشان وقت الشحن خصوصا إنه وقت مش كبير.

 

 

سعر الشحن:

زي أي تاجر أو موقع ناجح دايما خلي فيه حاجه إسمها ميزانية الشحن اللي بيها تقدر تتحرك و تواجه المرتجعات أو تعمل خصم لعميلك في الشحن، كمان فيه ناس ناجحه جدا بتزود علي سعر الشحن و فيه ناس تانيه ناجحه برضه بتوضح للعميل سعر الشحن، ده بيرجع لإستراتيجيتك في البيع و الربحيه و كده.

المهم إن أفضل و أنسب إستراتيجيه للبيع هو الشحن المجاني و اللي حضرتك بتكون ضفت تكلفة الشحن مسبقا علي سعر المنتج حتي لو المنتج منافس ليك بيبيعوه أقل فالمشتري حيجيلك علشان إنت عامل شحن مجاني.

شيب إيجيبت عملت باكدج للناس اللي بتبيع أونلاين لكن لازم تكون بتشحن معانا و فعلا شحناتك الشهريه بتعدي ال 100 شحنه علي الأقل.

التغليف:

حاول تغلف المنتج بتاعك في كيس يحميه و يكون شيك و يفضل بإسمك أو ساده و برضه لون الكيس مهم.
متكتبش علي الكيس او تعمل ورقه و تلصقها عليها بيانات العميل، إطبع فاتوره محترمه فيها بيانات متجرك و بيانات العميل و عنوانه و بيانات المنتج و سعره.
كمان إستخدم بوليصة الشحن بتاعت شيب إيجيبت و إستخدم بعد ما تغلف كيس شحن شيب إيجيبت المجاني و اللي بتطلبه من خدمة العملاء مجانا و بيوصلك كمان مجانا هو و البوالص.

البيك آب:

لما تطلب بيك آب متطلبش المندوب لكن حاول تتواصل مع خدمة العملاء علي رقم 01122233666 و لو مردوش إبعت واتسآب لنفس الرقم لإن ممكن يكون فيه مكالمه أخري أو الكل مشغول بالرد علي الواتسآب مع عملاء آخرين.

جهز حاجتك و إنتظر المندوب و لو إتأخر برضه كلم خدمة العملاء لإن المندوب لما حتكلمه أكيد طريقته في الكلام مش حتعجبك لإنه بيكون عليه ضغط كبير جدا جدا.

المندوب دائما ملتزم في شيب إيجيبت بخط سير و مواعيد محدده لو إتأخر بيتخصم منه أو بيتجازاه و مش مقبول إنك تسيب خدمة العملاء اللي تم تعيينهم مخصوص لخدمتك و تكلم مندوب مهمته إنه يلتقط الشحنات فقط أو يسلمها بأسرع و أنسب طريقه.

 

 

أثناء الشحن:

بعد لما يتعمل البيك آب بلغ العميل إنك شحنت الأوردر اليوم و متحددش الساعه.

قوله يتواصل مع شيب إيجيبت علي 01122233666 لإنها من اليوم مسئوله توصل لك الأوردر فأنا حتابع معاهم و حضرتك تابع برضه لو تحب.

 

بعد ما يستلم:

بعد ما يتم تأكيد الإستلام مهمتك تكلم العميل و تقوله إيه الأخبار يا فندم؟ الأوردر وصلك؟ في أي تعليق؟ و إخدم عميلك لإنك بكده بتكسب ولائه و كمان بتطمنه إنك مش من نظام بيع و إجري لأ دا إنت حد محترم و لازم أشتري منك تاني سواء أنا أو حد معرفه. 

 

الحياه الحلوه و السمعه الكويسه:

عميلك لازم يعلق علي المنتج و يقول رأيه، المهم لازم تسمعه كويس و تسمع منه قبل ما يشتكي لإن العميل لو إشتكي حيدخل في دائرة عاوز أرجع المنتج أو عاوز أبدل أو يتطاول و يقولك ده نصب.

 

 

خلي بالك المقال كان صريح معاك و تعمدنا نقولك ده بوضوح و بساطه علشان لو مش بتعمل أي من النقط السابقه إبدأ إعملها و إكسب عملاؤك و إكسب شركة الشحن اللي بتتعامل معاها زي ما هي كمان بتخدمك و زي ما عميلك عاوز يستمتع بمنتجك و يحب يشتري منك تاني.

HINTERLASSE EINEN KOMMENTAR

Bitte beachten Sie, dass Kommentare vor ihrer Veröffentlichung genehmigt werden müssen


ZURÜCK NACH OBEN